艷星.淘金 – 區家麟潮池博文

(耳語10)

大好星期天,一個不小心打開電視,新聞裡又有歪理。
本來,歪理太多,個個評論,真係好花時間。但是,尊貴的行政會議成員鄭耀棠,短短幾句,就出現三大問題,實在難得,也就記一筆。
鄭耀棠:「『筲箕論』,都是淘金般而已,篩下篩下就篩到『正嘢』出來,這是很重要的,但我們看一看,如果我們沒有這樣的做法,現在西方有些所謂普選,一些『艷星』都選了出來,這是否我們要見到的?好多國家的普選制度,都係經過初選。」

耳語(10.1):筲箕淘金?

講得好形象化,「筲箕」篩下篩下就會有正嘢。本人沒有淘金經驗,但筲箕不可能用作淘金,河裡的金沙很幼細,你唔係淘金條,用筲箕過濾,只會剩下沙沙石石,金沙反而漏走。看紀錄片可知,人們淘金,只係用碟或碗,由於金沙較重,一堆泥沙放碗碟裡,用水浸走較輕的泥沙,沉底的可能有一兩顆金沙。「筲箕」淘金,篩下篩下,係唔會有正嘢,只會剩低果啲唔等駛的廢物。
好的,「筲箕淘金」只係比喻,不要認真。

耳語(10.2):唔可以選艷星?

如果話,著得衫少係不道德,那麼,很多人西裝骨骨,但係衣冠禽獸,果啲點計?
如果話,出賣肉體係不道德,那麼,很多人出賣靈魂,果啲又點計?
艷星的定義是什麼,如果艷星是穿衣很少的演員,那麼,阿諾舒華辛力加就係非常成功的艷星政客。阿諾舒華辛力加常袒胸露臂,曬胸肌腹肌,電影角色中身體被衣服覆蓋的比例,應該比彭丹及娜姐要少。但阿諾舒華辛力加,當加州州長八年,競選連任時高票當選,勝對手一百萬票,身為美國共和黨人,在民主黨重地加州予取予求,你估加州啲人都係儍仔?

耳語(10.3):好多國家的普選制度,都經過初選?

可否賜教一下?除了伊朗,還有哪些「好多國家」?為何身為尊貴的行政會議成員,胡說八道,刻意混淆「政黨內初選」、「第二輪投票」?人家的「初選」,有廣泛民意基礎;「不合資格參選」,係講緊很客觀如年齡國籍犯罪記錄等條件,唔好扮天真。
講到尾,係咪初選篩選都好,最緊要係,邊個人攞住個筲箕有得篩下篩下咁過癮,點解係你有份而我無份,請畀一個理由,一個就夠。

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s