的士紅人的背後

最近幾周有點忙,就連每周必刨的壹周、忽周及Me!都跟甩了,今日終於看了最新一期壹周刊,剛好這篇坦白講很好看,講江湖大佬出冊後的故事,當他看到兒子行差踏錯,欲哭無淚,但願現在捱正行能給兒子看到,行古惑風光過又怎樣,望兒子回頭是岸。
他的的士因佈置特別而深受搭客青睞,當看到他背後的故事,感受到那種後悔莫及的感覺,但要追回失去的時間、感情,又談何容易,希望他兒子看到這篇訪問,希望這篇文章能觸動到他。

來自星星的 Taxi – 壹周刊坦白講專訪

壹周刊圖片

壹周刊圖片

郭志雄,五十四歲,的士佬。
他來自江湖,五年前轉行揸的士,搵食坐駕貼滿星星,成大埔的士紅人。
虎落平陽捱老襯,難得敬業樂業,整靚部車,過好日辰。

揸的士好悶,一日十幾個鐘,所以整靚部車,等自己投入。開頭想掛膠生果,有客話老土,叫我貼星星,好啦,聽佢講。
客人坐過我車,傳出去,久而久之,大家知有部星星的士。不時有客 call我,話朋友想坐我車,我話我响上水,佢話唔緊要,等你。
我每逢中秋節掛楊桃,聖誕節結綵帶,農曆年吊燈籠,播埋歌應節,客人開心我開心,本來十八個半埋單,依家廿蚊唔使找。
我成日同行家講,返工要淡定,緊緊張張,十蚊都無張。你想有客,洗吓部車啦,唔好搞到草蜢變泥蜢。我每日洗車,冷氣口放幾朵白蘭花,試過噴香水㗎,不過有客話敏感,都係白蘭花好,又可以幫襯吓賣花個阿婆。
有次我個仔坐我車,問我做乜搞成咁?我當時唔識答,唔通我真係同佢講:係因為你咩。
我十幾歲出來行蠱惑,幫人走私,見搵到錢就瞓身。後來喺大埔都叫有棱有角,被人斬過幾次,上過報紙,大埔鬍鬚雄吖嘛。好景時手下有過百個𡃁仔,每晚响大元邨冬菇亭間大牌檔擺兩圍。

以前大埔中心逢星期六日有小販擺地攤,我哋收陀地,每檔搵五六千,後來想轉正行,做物業管理,接收了翠屏、粉嶺中心,攞埋太和邨,點知○二年被人告恐嚇勒索,七除八扣,坐咗八個月。
出到嚟,地盤俾人搶晒。返上大陸,開幾檔麻雀仔,但老婆又疑心我包二奶,吵起上來,唯有返香港。
嗰時我先發覺,個家真係變咗,老婆情緒差,個仔群埋班壞人。有次執屋,發現有毒品工具,嗰一刻,欲哭無淚。
初時揸的士好尷尬,戴頂帽,見到自己以前啲𡃁,就踩快兩步,俾人認出,就話頂更。後來俾人認得多,索性除帽。
我揸的士,係想做俾個仔睇。出來行有運行咩?你老豆以前夠係大佬,今時今日咪又係揸的士,但捱份老襯搵萬零蚊,起碼心安理得。
每個古惑仔都要還債,睇還多還少,我個仔十四五歲最需要我嘅時候,我走咗去,依家還緊兒子債,希望早啲還清。

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s