有關鞋的小故事

女生總是對鞋這回事,有著沒法解釋的迷思,本身是Ferragamo的擁躉,某年夏天回港,在Twist碰到大減價,擁有第一對矮跟黑色漆皮蝴蝶鞋,之後就愛上了,是一發不可收拾的那種。
在壹周刊的坦白講,看到一篇有關鞋店老闆的訪問,他的經歷他的說話很有趣,買鞋是我的興趣,做鞋是他的細藝,我們應是同道人。

壹周刊圖片

壹周刊圖片

鞋王燈籠高高掛 – 壹周刊坦白講專訪

陳樹基,六十七歲,在深水埗開「賭坊」,其實係賣鞋佬。
他上半生在中環,服侍有錢人「升呢」踏上金色旅途。富豪地位高、眼角高,連鞋都要加高拍住鬼佬;然後下半生轉戰深水埗,依舊為客人度身訂造,但求讓住劏房公屋的窮人,每逢過年,都能穿上一對平靚正的皮鞋,挺起胸膛出門。

我呢度叫「如意賭坊」,唔係賭錢,係賣百幾蚊嘅真牛皮鞋,啲街坊聽到都唔信,話百幾蚊邊可能有真皮。 OK,我就大紅燈籠高高掛,搞到成個大檔咁,你唔信咪入嚟「賭」一鋪囉,我可以即場剪啲皮燒俾你聞,真皮燒起嚟係有𤓓味,唔𤓓我十倍賠番俾你。
而我賣嘅鱷魚皮鞋,四、五千蚊就有,平過出面四、五萬蚊多多聲。梗係,我哋喺廣州有自己廠,又有相熟老師傅,成本低好多,過年前好多有米阿叔專登嚟深水埗搵我訂造,一個月賣咗幾十對。
鱷魚皮鞋咁好賣,全靠我拍檔引入,佢以前喺希爾頓、文華、半島啲大酒店入面嘅富豪鞋鋪做 sales。以前文華有間皮鞋鋪叫藍塘,李嘉誠、趙世曾都係熟客仔。唔講你唔知,佢哋都指明要加厚個鞋墊,著咗就成個人升高。好似誠哥咁,當時佢只得兩、三個助手喺身邊,點似而家周圍都係啹喀。佢八十年代幫襯我買千幾蚊一對皮鞋,話要同啲鬼佬傾生意,鞋墊高得半吋就半吋,有錢人啲氣勢,就靠對皮鞋。
唔係華人生得矮先要墊高對鞋,以前班鬼佬牛高馬大都一樣要「造手腳」,仲要加到三吋厚,企高啲講嘢真係大聲啲咩。
我六八年入行,喺銅鑼灣同我老豆開鋪賣中價鞋,嗰時係鞋業嘅全盛期,我曾經有六間鋪,仲殺入中環做大孖沙生意。舊時租金平,每日做一萬蚊生意閒閒哋,九八年都係一萬蚊一日,但月租要成十六萬,點做呀。我索性執晒啲鋪返大陸做批發和加工,記得之前睇新聞見到吉拉德(澳洲前總理)仆親,佢著嗰對鞋,個牌子我哋都有造……不過佢仆親就唔關我事。
呢兩三年,香港經濟太差,我諗平價鞋生意應該有得做,於是揀咗深水埗吉咗四年嘅鋪位重新開檔。最近我仲搞抽獎,有三分二機會抽中,我成對鞋送俾你又點話。我搞咁多花臣,其實都係等啲街坊知呢度有筍嘢賣,又話俾啲窮人知,其實佢哋都可以著靚皮鞋。
依家再無有錢佬要我加高鞋墊,早兩日就有個印度佬行入嚟,佢右腳天生有六隻腳趾,夾硬著其他鞋好唔舒服,我就幫佢度身訂造,佢估唔到我呢啲地踎店有咁正服務,笑到見牙唔見眼。
一對皮鞋,係有錢佬嘅身份地位象徵,亦係窮人可以抬起頭行路嘅快樂。我聽到班深水埗街坊話正,好滿足。

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s